Алматыда 3-4 желтоқсанда «Алматы – азаттықтың алтын бесігі» атты алтын домбыра үшін аламан айтыс болып өтті. Айтысқа республиканың түкпір-түкпірінен 20 ақын келіп қатысты. Өңшең «сен тұр, мен атайын» деген дүлдүлдерге берілген тақырып, Алматының 1000 жылдығы және тәуелсіздіктің 25 жылдығы. Айтыс шын мәнісінде тартысты өтті. Дегенмен ақындардың көбі, жаттап келген толғауларын толғап, елдің ішінде шемен боп қатып қалған мұң-зарын толғауға тырысты. Әсіресе, алғашқы күні айтысқа алғашқы болып шыққан қос ақын жер туралы толғанды, сол жерді қорғаймын деп сотталып бара жатқан Макс Боқаев пен Талғат Аянға ара түсті. Өміржан мен Рүстем ақынның айтысы, бірінші күннің ең шоқтықтысы болды десек артық айтқандық болмас.
Екінші күнгі айтыста Болатбек Оразбаев жарқырап көзге түскенімен, қазылар алқасының шешімімен бас жүлде қызылордалық – Мұхтар Ниязовқа бұйырды. Болатбек Оразбаев І жүлдеге лайық деп танылып, екі күн бойы қыз бен жігіт айтысының керемет үлгісін жасаған оралдық Жансая Мусина ІІ орынға табан тіреді. Мейірбек Сұлтанхан, Өміржан, Серікзат Дүйсенғазиндер үшінші орынды місе тұтты. Дегенмен, зал толы көрермен қазылар алқасының шешімімен келіспейтіндіктерін білдіріп, біразға дейін шулап отырды. Алматы қаласының әкімі Бауыржан Байбек көрерменнің көңілін демеу үшін бас жүлде мен бірінші жүлдеге тағы бір миллион теңгеден беретіндігін айтып, басу айтты. Ал Болатбек Оразбаев “миллион теңге үшін емес, халықтың алғысы үшін” айтысқандығын айтып, алғысын білдірді.
Парақшамызға жазылыңыз
