Ақорда 21 қыркүйек күні Қазақстан Республикасы Президентінің кезектен тыс сайлауын тағайындау туралы қаулыға қол қойылғаны туралы хабарлады.
Қаулыда Қазақстан Республикасы Конституциясының 41-бабының 3-1-тармағына сәйкес Қазақстан Республикасы Президентінің кезектен тыс сайлауы 2022 жылдың 20 қарашасына тағайындалатыны жазылған.
Қазақстан Республикасының Орталық сайлау комиссиясына кезектен тыс президенттік сайлауды ұйымдастыру мен өткізуді қамтамасыз ету жүктелген.
Ал 22 қыркүйекте Нұрлан Әбдіровтың төрағалығымен Қазақстан Республикасы Орталық сайлау комиссиясының отырысы өтті, оған саяси партиялардың, бұқаралық ақпарат құралдарының, Бас прокуратураның, ақпарат және қоғамдық даму және ішкі істер министрліктерінің өкілдері, бейнеконференцбайланыс режимінде облыстардың, республикалық маңызы бар қалалардың және астананың аумақтық сайлау комиссияларының мүшелері қатысты, – деп хабарлайды ҚР Орталық сайлау комиссиясы.
Отырыста сөз алған Ортсайлауком төрағасының орынбасары Константин Петров сайлаудың күнтізбелік жоспарын ұсынды.
Жоспар бойынша Қазақстан Республикасы Президенттігіне кандидаттарды ұсыну биыл 23 қыркүйекте басталып, 11 қазан сағат 18.00-де аяқталатыны белгілі болды.
