“Мамам қашан мектептен келеді?”,-бұл анасын күтіп жүрген бес жасар қыздың сағыныш сөзі. Оның анасы мен әкесі автобустың астында қалып, мерт болған. Естеріңізде болса, оқиға Алматы қаласында 22 желтоқсанда сағат 18:15 шамасында “47” бағытта қатынайтын автобус жүргізушісі жолаушының соққысынан соң есінен танып рульге ие бола алмай аялдамадағыларды қағып, салдарынан төрт адам қаза тапқан еді. Сол төрт адамның екеуі бес жасар қыздың ата-анасы марқұмдар Талап Қасымов пен Гүлжахан Ырсымбаева. Олар мектепте бірге істейтін. Үйлеріне асыққан ерлі-зайыпты аялдамада такси тоқтатып тұрғанда, оқыс апаттан мерт болды. Артында төрт баласы жетім қалды.
Желі қолданушылары “бір адамның ашуы ма, әлде оңбағандығы ма, 100 теңге төлемей ерегіскен жолаушының кесірінен 4 бала жетім қалды”,-деп пікір білдіруде.
