19 қазан күні Алматыдағы «Ramada» қонақүйінде ERG қолдауымен Мінбер журналистерді қолдау орталығы ұйымдастырған дата фестиваль өтті. Мінбердің 15 жылдығына арналған ісшараға шамамен 60-тан аса адам қатысты. Оның ішінде медиатренерлер, өңірдегі журналистер және оқытушылар бар.
Фестивальда екі панельдік сессия мен төрт шеберлік сағаты ұйымдастырылды. «Дата және жасанды интеллект. Қазақ журналистері заманауи трендтерге қаншалықты дайын?» деп аталатын бірінші панельдік сессияда журналистиканың Қазақстандағы болашағы мен медиалардың мемлекеттік тапсырысқа жұмыс істеуі талқыланды. Қазақтілді және орыстілді журналистің еңбегі әртүрлі бағаланатыны да осында айтылды.
Спикерлер ретінде IT-аналитик Тимур Бектұр, ҚазҰУ Ассоц-профессоры Қарлыға Мысаева, Internews Kazakhstan CAIIA бағдарламасының менеджері Бэлла Қасымқызы, “Азаттық” радиосының интернет-редакторы Мақпал Мұқанқызы және “Мінбер” жобасының координаторы, стратегиялық коммуникация маманы Бақыт Аманжолқызы сөз сөйледі. Панельдік сессия сұрақ-жауаппен аяқталды.
«Мінберге 15 жыл: Қазақ журналистикасында не өзгеріс?» атты екінші панельдік сессия түстен кейін өтті. Мұндағы спикерлер – “Айқын” газетінің бас редакторы Амангелді Құрметұлы, медиа сарапшы, журналист Асылхан Мамашұлы, “Kursiv.media” іскери порталының шеф-редакторы Риза Исаева, медиатренер Жұлдыз Әбділда және ERG өкілі Жанболат Серікбай. Бұл жақта өңірлік журналистердің мүмкіндіктері, медиадағы цензура, жас журналистердің цифрлық технологияларды қолдана алуы сөз болды.
Барлық панельдік сессия мен шеберлік сағаты аяқталғаннан кейін марапаттау рәсімі өтті. Биыл жазда Minber қоры Ақтөбе, Қостанай және Павлодарда датажурналистика шеберханасын өткізген болатын. Оған өңірдегі журналистер қатысып, түрлі тақырыптарда дата стори жазды. Дата фестивальда үздік деп танылған дата сторилердің авторларына қаржылай сыйлықтар мен сертификаттар берілді.
Барлығы 11 адам марапатталды. Ынталандыру сыйлығын Мөлдір Гапиз, Руслан Алкеев және Нұргүл Қонақбаева алды. Бірінші, екінші және үшінші орындар Ақтөбелік журналистер Арайлым Букенбаеваға (1 орын), Райбек Сағадатовқа (2 орын), Меруерт Қалиеваға (3 орын) бұйырды.
Данагүл Науқанова
Парақшамызға жазылыңыз
