Бүгін Астанада “Қарызсыз қоғам” жобасын іске асыру бойынша қорытынды іс-шара өтті. Биыл 780 мың қазақстандық қаржылық сауатын арттыра алды.
Мәжіліс спикері, “AMANAT” партиясының төрағасы Ерлан Қошанов кездесуде “Қарызсыз қоғам” қаржылық сауатын арттыру жобасы еліміздегі жаңа саяси мәдениеттің үлгісіне айналғанын атап өтті. Айтуынша, жобаның табысты болуы үшін партия, Парламент, Үкімет, жергілікті билік органдары мен қаржы секторының өкілдері бірлесіп жұмыс істеп жатыр.
Мәжіліс Спикері халықтың кредиттелуі ең өзекті қоғамдық проблемалардың біріне айналғанын атап өтті. Оны шешу үшін мемлекет басшысы Қасым-Жомарт Тоқаев жүйелі шаралар қабылдап жатыр. Президенттің тапсырмасы бойынша жеке тұлғалардың банкроттығы және несиелеу тәуекелдерін азайту туралы заңдар қабылданды, ал бес жыл бұрын 500 мың адамға бір реттік несиелік рақымшылық жарияланды.
Қошановтың айтуынша, “AMANAT” партиясы Мемлекет басшысының жоғары бағасына ие болған қазақстандықтардың қаржылық сауаттылығын арттыру жобасын бастады.
“Қарызсыз қоғам” жобасы партиялық жобадан жалпыұлттық жобаға айналды. Біз Президент алға қойған үлкен, стратегиялық міндет – қоғам мәдениетін өзгерту мәселесін бірлесіп шешіп жатырмыз. Біз азаматтарды мемлекеттен өз мәселелерін шешуді күтпеуге үйретеміз, халыққа өз өмірлерін жақсы жаққа өзгертуге, өздеріне және жақындарының тағдырына жауапкершілікпен қарауға мүмкіндік береміз. Біз азаматтарға адал еңбек етуге, лайықты табысқа жетуге және болашаққа сенімді қарауға мүмкіндік беретін жаңа құзыреттер береміз. “Қарызсыз қоғам” жобасы – жаңа мемлекеттік стратегияның бір бөлігі. Бұл – Мемлекет басшысының Әділетті Қазақстанды құру бағытындағы негізгі идеясы және “Адал азамат” бастамасының негізі”, – деді Мәжіліс Спикері.
Айта кетейік, қазіргі уақытта жоба аясында еліміздің барлық өңірінде 180 мыңнан аса адам оқытылды. Қатысушылардың 40%–дан астамы қарыз жүктемесін қысқарта алды, 70%-ы ай сайынғы несие төлемдерінің мөлшерін азайтса, 41%-ы несиелердің жалпы санын азайтты.
Сонымен қатар, жазғы каникул кезінде “Қарызсыз қоғам” сарапшылары мектептердің, колледждердің және жоғары оқу орындарының 7,5 мың оқытушысын қаржылық сауаттылықты оқыту әдістемесіне оқытуды өткізді. Биыл 500 мыңнан аса оқушы мен 100 мың студент білім алды.
Бұдан бөлек, “AMANAT” партиясының Төрағасы “Қарызсыз қоғам” жобасын қаржылық интернет-алаяқтыққа қарсы күрес, бизнесті дамытуды, тұрғын үй алуды, білім беруді және басқаларды қаржылық қолдау мемлекеттік бағдарламалары арқылы мемлекет ұсынатын жаңа қаржы құралдарын оқыту сияқты бағыттар бойынша кеңейту қажеттігіне тоқталды.
Өз кезегінде Премьер-Министрдің орынбасары – Ұлттық экономика министрі Нұрлан Байбазаров Үкімет азаматтарды қолдаудың маңызды әрі тиімді құралы ретінде “Қарызсыз қоғам” жобасын іске асыруға ерекше назар аударатынын атап өтті. Атап айтқанда, студенттер мен оқушыларды қаржылық сауатқа және кәсіпкерлік негіздеріне оқыту жалғастырылады. Ал мемлекеттік органдар тарапынан жобаны масштабтау үшін, оның ішінде жоба түлектерін жұмысқа орналастыруға жәрдемдесу және қаржылық алаяқтыққа қарсы іс-қимылды күшейту арқылы тұрақты және жан-жақты қолдау жүзеге асырылатын болады.
Қаржы нарығын реттеу және дамыту агенттігінің төрайымы Мадина Әбілқасымова қарыз алушылардың борыштық жүктемесін есептеуге қойылатын талаптардың қатаңдатылғанына және кредиттер бойынша сыйақының шекті мөлшерлемелерінің төмендетілгеніне назар аударды. Сонымен қатар, коллекторларға азаматтардың несиелерін сатуға екі жылдық мораторий енгізілді. Оның айтуынша, осы және басқа шаралар қарыз алушылардың жағдайын айтарлықтай жақсартуға мүмкіндік береді.
Halyk Bank басқарма төрайымы Үміт Шаяхметова банк “Қарызсыз қоғам” жобасын қаржыландырумен ғана емес, азаматтарды оқытуға тікелей қатысумен де белсенді қолдайтынын атап өтті. Оның айтуынша, бастаманың маңызды бөлігі қазақстандықтарды жұмыспен қамту нысандарына тарту болды, бұл қарыз алушыларға қарыздарын өтеуге және жинақтарын қалыптастыруға көмектеседі.
“Біз елдің жетекші банкі ретінде халықтың кредит бойынша сауаты дұрыс болуына назар аударамыз. Ал бұл өз кезегінде қаржылық сауаттың жоғары деңгейімен ғана мүмкін болады. Біздің банк жобаның бастауында тұрған серіктес ретінде қаржылық сауатты оқытуды қаржыландыруды жалғастырып қана қоймай, жобаны іске асыруға, оны танымал етуге және масштабтауға белсенді қатысады деп айта аламын. Біз мұны ел экономикасын одан әрі дамыту және экономикалық белсенді, қаржылық жағынан гүлденген қоғамды қалыптастыру жолындағы өз миссияларымыздың бірі деп санаймыз”, – деді Halyk Bank басшысы.
Сондай-ақ, іс-шараға Еңбек және халықты әлеуметтік қорғау министрі Светлана Жақыпова, Білім министрі Ғани Бейсембаев, Ғылым және жоғары білім министрі Саясат Нұрбек, сондай-ақ еліміздің барлық өңірлерінен менторлар мен жоба қатысушылары қатысты. Кездесу соңында серіктестер мен жоба сарапшыларына алғыс хаттар мен естелік марапаттаулар тапсыру рәсімі өтті.
Жобаны іске асыруға 12 коммерциялық банк пен 11 мемлекеттік орган қатысатынын атап өткен жөн. Тілек білдірушілерге ыңғайлы болу үшін qogamfin.kz онлайн-платформасы әзірленді. Сайт арқылы сіз оқуға жазылып, пайдалы материалдар мен видеосабақтарды жүктей аласыз.
Парақшамызға жазылыңыз
