Тәуелсіздік алғалы олимпиада ойындарында ел намысын қорғаған легионерлердің 15-і ғана қоржынға жүлде салды. Олардың үшеуі алтын, үшеуі күміс, тоғызы қола. Соңғы Париж олимпиадасында жүлде алған спортшылар толықтай өз елімізде туып, өз елімізде спорттық мансабын бастаған қыз-жігіттер. Былайша айтқанда қолтума спортшылар.
Токио олимпиадасындағы сәтсіздіктен кейін көп жанкүйер құрамаға легионер тарту мәселесіне ашық қарсылық таныта бастады. Сырттан келген спортшыға бюджет қаржысын шашқанша, балалар спортын, бұқаралық спортты дамытайық деген әңгімелер ашық айтылды.
Күні кеше Мәжіліс дене шынықтыру және спорт мәселелері бойынша заң қабылдады. Онда Қазақстан азаматтығы жоқ спортшыларды бюджет қаражаты есебінен және квазимемлекеттік сектор субъектілерінің қаражаты есебінен қаржыландыруға тыйым салу туралы өзгеріс енгізілді. Осыған орай енді мемлекет легионерлерге қаржы бөлмейді. Бұл норма Президенттің мемлекеттік қаражатты тиімді пайдалану туралы тапсырмасын орындау мақсатымен әзірленді.
Енді дене шынықтыру және спорт саласындағы мемлекеттік мекемелер ақылы қызмет көрсету және олардан түсетін кірісті бюджет заңнамасына сәйкес пайдалану мүмкіндігіне ие болады.
Спорт мекемелері іс-шараларды (спорттық жарыстар, семинарлар, кеңестер мен конференциялар) ұйымдастыру және өткізу мақсатымен халықты арнайы спорттық жабдықтармен, дене шынықтыру-сауықтыру және спорт объектілерімен қамтамасыз етуге қызметтер, спорттық медицина саласындағы қызметтер арқылы табыс таба алады.
Легионерден бас тарту ел спортына қалай әсер етеді? Оны уақыт көрсетер. Алғашында футбол, футзал сияқты спорт түрлері тұралағандай күй кешері сөзсіз. Бірақ командасын күшейткісі келген басшы қаржы тауып, демеуші іздеуге кіріседі. Бұл спорт саласы менеджерлерінің жаңа толқынының пайда болуына әсер етеді.
Түгелбай Бисен,
БҚО, Орал қаласы
Парақшамызға жазылыңыз
