2025 жылдың қаңтарынан бастап Шығыс Қазақстан облысының бірнеше ауданы жаңа жұмыс тәртібіне көшті. Бұл бастаманы алғаш болып Катонқарағай ауданы енгізсе, қазір оған Зайсан, Тарбағатай, Ұлан, Күршім, Глубокое, Шемонаиха, Марқакөл, Самар, Үлкен Нарын және Алтай аудандары қосылды.
Жаңа кестеге сәйкес, ШҚО-ның осы 11 ауданында мемлекеттік мекемелер, кәсіпорындар және әлеуметтік қызметтер таңғы 08:00-ден кешкі 17:30-ға дейін жұмыс істейді. Түскі үзіліс уақыты 12:00-ден 13:30-ға дейін белгіленген. Алайда бұл өзгерістер білім беру мекемелері, балабақшалар мен медициналық ұйымдарға әсер етпейді, себебі олар бұрыннан осындай режимде жұмыс істеп келеді.
Жаңа жұмыс кестесін енгізудің басты мақсаты – жұмыс үдерістерін оңтайландырып, ауданаралық өзара әрекетті жақсарту. Сондай-ақ, бұл өзгерістер өңірдің табиғи ерекшеліктеріне, атап айтқанда күннің ерте шығуы мен батуына байланысты қабылданған. Осылайша, күндізгі жарық барынша тиімді пайдаланылып, еңбек өнімділігі артады және тұрғындардың өмір сүру сапасы жақсарады деп күтілуде.
Глубокое және Шемонаиха аудандарында жаңа тәртіп енгізілгеннен кейін жергілікті билік өкілдері тұрғындармен кездесулер өткізіп, олардың пікірлерін тыңдады. Шемонаиха ауданының әкімі Дидар Кеңесбаев бұл өзгерістер бастапқыда белгілі бір қолайсыздықтар тудыруы мүмкін екенін, дегенмен бұл өзгеріс ауданның дамуы үшін қажет екенін айтты.
– Жаңа жағдайларға бейімделу уақытты қажет етеді. Алайда бұл – жұмыс үдерістерін жетілдіруге және әлеуметтік, коммуналдық мекемелердің тұрақты қызметін қамтамасыз етуге бағытталған маңызды қадам. Барлық бюджет қызметкерлеріне қолдау білдіремін және кез келген сұрақтарға жедел жауап беруге дайынбыз, – деді Дидар Кеңесбаев.
Глубокое ауданының әкімі Елдар Тұмашинов та жаңа жұмыс кестесінің тиімділігін атап өтті:
– Бұл өзгерістер тұрғындардың өмір сапасын жақсартуға бағытталған. Әсіресе, адамдардың отбасымен көбірек уақыт өткізуіне мүмкіндік береді. Жаңа тәртіптің еңбек өнімділігіне оң әсер ететініне сенімдіміз, – деді ол.
Тұрғындар да бұл бастамаға қатысты пікірлерін білдірді. Глубокое ауданындағы демалыс орталығының аға мәдени ұйымдастырушысы Лилия Эрдман:
– Ауданның барлық құрылымдарының бір реттілікпен жұмыс істегені бізге тиімді өзара іс-қимыл жасауға және іс-шараларды үйлестіруге көмектеседі. Бұл бастаманы қолдаймын, – деп пікір білдірді.
Жергілікті тұрғын Роза Әділбаева да жаңа кестені оң бағалады:
– Кешкі уақыттың бос болуы үй шаруасына және отбасымен қарым-қатынасқа көбірек көңіл бөлуге мүмкіндік береді, – деді ол.
Жаңа жұмыс тәртібінің енгізілуі Шығыс Қазақстан облысы тұрғындарының өмір сапасын арттырып, еңбек өнімділігін көтеруге ықпал етеді деп күтілуде. ШҚО әкімдігінің мәлімдеуінше, бұл – аймақтың әлеуметтік және экономикалық дамуына жасалған маңызды қадам.
Парақшамызға жазылыңыз
