Фотоға түсірген: Нұргүл Нұрланқызы bairaqmedia.kz
Бүгін Алматыда жүк көлігі қағып кеткен 7 жасар Айзере Ибраева жерленді. Қайғыдан қан жұтқан отбасы бастапқыда жаназа рәсіміне журналистердің қатысуына қарсы болғанымен, кейін келісім берді. Жерлеу рәсіміне марқұмның жақындары мен туған-туыстарынан бөлек, жедел жәрдем қызметкерлері және БАҚ өкілдері де жиналды. Олар екінші сынып оқушысының өліміне кінәлі адамдардың жазалануын талап етті.
Марқұмның туыстары бұл қайғылы оқиғаға тек жүк көлігінің жүргізушісі ғана емес, жолда жоғары жылдамдықпен жүйткіп өткен автобус жүргізушісі де кінәлі деп есептейді. Олардың айтуынша, автобустың қатты жылдамдықпен жақындап келе жатқанын көрген қыз үрейленіп, артқа шегінгенде жүк көлігінің астына түскен.
– Автобус жүргізушісінің жазалануын сұраймыз. Ол өліммен аяқталған жол апатына себеп болды. Жоғары жылдамдықпен жүйткіп келе жатқанынан бала қорқып, артқа қарай шегінді, – дейді көзіне жас алған марқұмның туыс ағасы.
– Мұндай апат осы жаяу жүргіншілер жолағында бірінші рет болып отырған жоқ, – дейді жергілікті тұрғындар.
Айта кетейік, Айзере Ибраева отбасындағы төрт баланың үшіншісі болған. Оның артында екі әпкесі мен інісі қалды.
Оқиға қалай болды?
Қайғылы оқиға 2 сәуір күні сағат 12:17 шамасында Алматы қаласының Қарасу ықшамауданында болды. Бұрындай көшесімен келе жатқан Renault маркалы жүк көлігі Новое көшесінің қиылысында жаяу жүргіншілер жолағынан өтіп бара жатқан екінші сынып оқушысын қағып кеткен. Өкінішке қарай, бала алған ауыр жарақаттарынан оқиға орнында көз жұмды.
Жүк көлігінің жүргізушісі ұсталып, оның үстінен қылмыстық іс қозғалды. Қайғылы оқиға марқұмның анасының көз алдында болған. Ол қосымшадан келе жатқан қызын жолдың арғы бетінде күтіп тұрған.
Жадыра Әділбекқызы
Дереккөз: bairaqmedia.kz
Парақшамызға жазылыңыз
