“Ауруханада кезек күтіп шаршадық. Бір дәрігер бәріне қалай үлгереді?”- дейді Жібек жолы ауылының тұрғыны. Ауыл тұрғындары дәрігерлер тапшылығына шағымдануда. Алайда, жергілікті билік дәрігерлер жеткілікті деп отыр. Шын мәнінде жағдай қандай?
Алматы облысы, Қарасай ауданы, Жібек жолы ауылының тұрғындары дәрігерлер жетіспеушілігіне шағымдануда. Олардың айтуынша, дәрігерге қаралу үшін таңертеңнен кешке дейін кезек күтуге мәжбүр. Ал кей жағдайда ауылда қажетті маман болмағандықтан, Қаскелеңге немесе қалаға баруға тура келеді.
“Кезек күтіп таңнан кешке дейін отырамыз. Бар уақытымыз сонда кетеді. Ал егер ауылда керекті дәрігер болмаса, Қаскелеңге не Алматыға баруға тура келеді. Қаладағыдай дәрігерлер көп болса, бұлай әуре болмас едік. Ауылымызда тіпті жатып емделетін аурухана жоқ, сондықтан қалаға барып емделуге мәжбүрміз,” – дейді ауыл тұрғыны.
Тұрғындардың айтуынша, ауылда терапевт, ЛОР, невропатолог, хирург, кардиолог, гинеколог және фельдшер жетіспейді.
“Біз секілді үлкен кісілер үшін кардиолог өте қажет, жүрек аурулары көп кездеседі. Немерелерімді көрсететін невропатолог та жоқ. Қажетті маман табылмай, үнемі қалаға барып жүреміз. Ал жедел жәрдем шақырсақ, 1 сағатта әрең келеді. Себебі, фельдшерлер үлгермейді – шақыртулар өте көп. Ауылда бір дәрігер екі маманның жұмысын атқарып жүр. Бұл дәрігерлер жетіспеушілігінің айқын дәлелі,”– деп қынжылады ауыл тұрғындары.
Олардың пікірінше, бұл мәселені шешу үшін ауылға білікті мамандарды тарту, жаңа аурухана салу және дәрігерлердің жағдайын жақсарту қажет.
“Мемлекет ауылға көбірек дәрігер жіберіп, олардың жұмыс істеуіне жағдай жасауы керек. Қазір дәрігерлер ескі ғимаратта жұмыс істеп жүр. Егер жақсы аурухана салып берсе, мамандар да көп келер еді. Біздің сұрайтынымыз – ауылымыздың денсаулық сақтау жағдайын жақсарту,” – дейді ауыл тұрғыны.
Ал бас дәрігердің айтуынша, ауылда дәрігерлер жеткілікті. Ол: “Кім айтты дәрігер жетіспейді деп? Дәрігерлерді жұмысқа алатын мен емес, бұл мәселе аудандық деңгейде шешіледі,” – деп сұрақтарға нақты жауап беруден бас тартты және аудандық басқармаға жүгінуге кеңес берді.”
Қазір ауыл халқының саны 7,7 миллион адамнан асады, бұл жалпы халық санының 38%-ы. Соның ішінде балалар – 37%, ересектер – 63%. Ауыл тұрғындарына 5 мыңнан астам медициналық нысан, соның ішінде 2 мыңнан аса медициналық пункт, 855 фельдшерлік-акушерлік пункт, 1 мыңға тарта дәрігерлік амбулатория, 170 емхана және 184 аурухана медициналық көмек көрсетеді.
Денсаулық сақтау министрлігінің 2024 жылғы дерегі бойынша, ауылдағы медицина ұйымдарында қазір 52 мың маман еңбек етеді. Олардың 11 мыңнан астамы – дәрігер, 41 мыңға жуығы – орта медицина персоналы. Бірақ әлі тапшылық бар – 1122 медицина қызметкері жетіспейді.
Бүгінде елімізде ауылдағы медицинаны дамыту үшін “Ауылдық денсаулық сақтауды жаңғырту” ұлттық жобасы іске асырылып жатыр.
Денсаулық сақтау министрлігінің мәліметінше, ұлттық жобаның шеңберінде 2024 жылы ауылда 263 медициналық нысан салынып, пайдалануға берілді. 2025 жылы қосымша 271 медициналық орталық салынады.
Оның ішінде өңірлердің картасында 47 дәрігерлік амбулатория, 101 фельдшерлік-акушерлік пункт, 115 медициналық пункт пайда болды.
Ауылға барған дәрігер 8,5 млн теңге алады
Гүлдара Нұрымова ауылдағы дәрігер тапшылығы мәселесін шешу үшін ауылды жерлерге көшіп келген мамандарға 100 еселенген ең төменгі жалақы мөлшерінде көтерме жәрдемақы төленетінін атап өтті. Бұл норма денсаулық сақтау мәселелері жөніндегі заңға енгізілген.
Жібек жолы ауылының тұрғындары дәрігер тапшылығына шағымданса, бас дәрігер мәселе жоқ екенін атап өтеді.. Ауыл тұрғындары қажетті мамандардың жоқтығын, кезектің ұзақтығын және қалаға баруға мәжбүр екенін айтса, ресми тарап бұл мәселе аудан деңгейінде шешілетінін жеткізді. Дәрігер тапшылығы – тек бір ауылдың емес, көптеген елді мекендердің ортақ проблемасы. Денсаулық сақтау жүйесіндегі теңсіздік ауыл тұрғындарының медициналық көмекке қолжетімділігін шектеп отыр. Бұл мәселені шешу үшін мемлекет тарапынан ауылдық жерлерге дәрігер тарту, жағдай жасау және инфрақұрылымды жақсарту қажет. Ауыл тұрғындарының денсаулығы – мемлекеттің басты назарында болуы керек. Бұл мәселені жақын арада шешілетініне, мемлекеттің өз қолына алатынына сенеміз. Ауыл тұрғындары үлкен сенім артып отырғаны байқалады.
Ақдана Ержанова,
SDU, “Журналистика” мектебі І курс студенті
Парақшамызға жазылыңыз
