Кәсіпқой бокста 23 кездесу өткізіп, оның 17-сін нокаутпен аяқтаған Батыр Жүкембаев “Барыс Аренада” ұйымдастырылған тарихи бокс кешінде өнер көрсетті.
Отандасымыз Ұлыбритания боксшысы Кейн Гарднермен қолғап түйістірді. “777” лақап атымен танымал қазақ боксшысының қарсыласы оңай шағылар жаңғақ емес еді, ол 17 қарсыласының жетеуін нокаутқа түсірген.
Алғашқы раундтарда қос боксшы тең айқасты. Тек соңғы раундтарда Жүкембаев қарқынға қарқын қосып, британдықты тықсыра түсті. Әсіресе жетінші, сегізінші және тоғызыншы раундтарда қазақ боксшысы қарсыласын қуалап жүріп соққының астына алды.
Толық дистанцияны еңсерген айқастың қорытындысы бойынша төрешілер жеңісті Батыр Жүкембаевқа берді.
– Астана төрінде өтіп жатқан бокс кешінде өнер көрсету — мен үшін үлкен мақтаныш. Өзімнің туған күнімде, отандастарымның ортасында жеңіске жетіп жатырмын. Маған қолдау көрсеткен ағаларыма және жанкүйер болған әр адамға алғысым шексіз, – деді Батыр.
Түгелбай Бисен
Парақшамызға жазылыңыз
