Бірден екі тұжырымдағы әлем чемпионы атағы сарапқа салынған Астанадағы тарихи бокс кешінің тағы бір дебютанты Махмұд Сабырхан екінші жеңіл салмақта жұдырықтасты.
Алғашында Махмұд Николас Тордацилла атты боксшымен күш сынасуы керек болған. Бірақ соңғы сәтте қарсыласы ауысып, вьетнамдық Дак Хайнх атты былғары қолғап шебері келді.
Дак осыған дейін кәсіпқой бокста үш жекпе-жек өткізіп үлгерген. Оның біреуінде жеңілсе, екі кездесуін мерзімінен бұрын аяқтаған.
Соған қарамастан Махмұд Сабырхан шеберлігін көрсетіп, айқын басымдық танытты.
Алғашқы раундта-ақ вьетнамдық боксшыны бүйірден соғып, бір есеңгіретіп алды. Одан соң бір сұлатты. Қарсыласы ол кезде айқасты жалғастыруға бекінгенімен біздің боксшы оның талпынысына нүкте қойып, жекпе-жекті екінші раундта аяқтады.
– Қарсыласым ауысып кетті. Бұл үшін жанкүйерлерден кешірім сұраймын. Бірақ біз кез келген боксшыға дайынбыз. Бұл тек бастамасы ғана, алда әлі үлкен жеңістер күтіп тұр, – деді Махмұд Сабырхан жекпе-жек аяқталған соң.
Түгелбай Бисен
Парақшамызға жазылыңыз
