11 сәуірде Алматы қаласының Наурызбай аудандық соты сатиралық контент авторы, журналист Темірлан Енсебекті Қазақстан Республикасы Қылмыстық кодексінің 174-бабы бойынша – әлеуметтік және ұлттық араздықты қоздырды деп танып, оған қатысты үкім шығарды.
Сот шешімімен ол 5 жылға бостандығын шектеу жазасына кесілді. Сонымен қатар, Енсебекке қоғамдық қызметпен айналысуға, соның ішінде журналистикамен айналысуға, сұхбат беруге, тренинг өткізуге және іс-шараларды жүргізуге тыйым салынды.
Не болды?
Бұл іс ресейлік тележүргізуші Тина Канделаки туралы сатиралық видеоға байланысты қозғалған. Бейнероликте «Йоу, орыстар» атты ән қолданылған, ал билік өкілдері оны орыс ұлтына тіл тигізу деп бағалаған.
Темірлан өз кінәсін мойындаған жоқ, бірақ ең жеңіл жаза қолдануды және шектеулерді азайтуды сұрады. Оның қорғаушысы сараптамалық қорытындының сапасына күмән келтіріп, сарапшының жеткілікті біліктілігі жоқ екенін атап өтті. Сондай-ақ, Қазақстандағы этникалық орыстардың атынан бейнежазба ешқандай қорлау немесе араздық тудырмағаны туралы ашық хат ұсынылды.
Сот Темірланның ноутбугі мен ұялы телефонын мемлекет пайдасына тәркілеуді бұйырды. Оған қоса, Темірлан Енсебектен сараптама шығындары үшін 841 теңге және жәбірленушілерге өтемақы қоры пайдасына 20 АЕК көлемінде қаражат өндіру шешімі шығарылды.
Сот үкіміне сәйкес, егер ол белгіленген шектеулерді бұзса, жаза бас бостандығынан айыру жазасына ауыстырылуы мүмкін.
“Сіздің тәртібіңіз мінсіз болуы керек. Екі мәрте бұзушылық орын алса, жазаңызды бас бостандығынан айыруға ауыстыруға негіз болады”, – деді судья Бейнегүл Қайсина.
Ол сондай-ақ, егер Темірлан Енсебек жұмыс таба алмаса, 100 сағат қоғамдық жұмыс істеуге міндетті екенін айтты.
Сот залында Темірлан Енсебек бұл талаптарды орындай алуы қиын болатынын айтып, алдағы бес жыл бойы “террорист” статусында болатынын жеткізді.
“Жоқ, террорист емес, экстремист”, – деп нақтылады судья Қайсина.
Парақшамызға жазылыңыз
