Ермек Серкебаев өтті өмірден

Бүгін, 2013 жылы қарашаның 16 күні таңертеңгі сағат 9-30 –да қазақтың бір туар Ұлы Әншісі Ермек Серкебаев 87 жасында Алматы қаласында қара шаңырағында дүние салды. Мінбер журналистерді қолдау қоры, Мінбер. Кз. Сайт қызметкерлері атынан марқұмның туған-туыс, бала-шағаларына, дос-құрбы, замандас-құрдастарына, Ер-ағаны жақсы көретін қазақ халқына, тыңдаушыларына көңіл айтамыз.

Ермек Бекмұхамедұлы 4 шілдеде 1926 жылы Қызылжар қаласында туған. Ол –  КСРО-ның Халық әртісі (1950), Қазақ КСР Халық әртісі (1956), профессор (1983), қоғам қайраткері. Социалистік Еңбек Ері (1986).

Ол үшінші сыныптан бастап оқуын Алматыдағы № 54 мектепте жалғастырады. Жетінші сыныптан бастап П. И. Чайковский атындағы музыкалық училищеде оқуын жалғастырды. 1941—1943 ж. П. Чайковский атындағы Алматы музыкалық училищесінде скрипка класы бойынша оқыған. 1946 жылы консерваторияға қабылданады. Е. Серкебаев консерваторияны 1951 жылы Кургановтың сыныбында тәмамдаған соң опера және балет театрына оралады. 1951 ж. Құрманғазы атындағы Алматы консерваториясын (вокал бойынша) бітірген.

Серкебаев орындаған партиялардың ішінде Қожағұл, Амангелді (М. Төлебаев, «Біржан мен Сара»; М.Төлебаев және Е.Брусиловский, «Амангелді»), Абай, Серке (А.Жұбанов пен Л.Хамиди, “Абай”; С.Мұхамеджанов, “Айсұлу”), Тарғын, Артем (Е.Брусиловский, “Ер Тарғын”, “Дударай”), Онегин, Елецкий (П.Чайковский, “Евгений Онегин”, “Пиковая дама”), Петруччио (В.Шебалин, “Укрощение строптивой”), Фигаро (Дж.Россини, “Севильский цирюльник”), Валентин (“Фауст”), т.б. бар.

Вокалистер конкурсының (Будапешт, 1953) лауреаты. КСРО Мемлекеттік сыйлығының (1977) және Қазақ КСР Мемлекеттік сыйлығының (1972) иегері. “Музыка” номинациясы бойынша 2000 ж. “Тарлан” сыйлығын жеңіп алған. “Отан” 2 мәрте Ленин, Қазан революциясы, Енбек Қызыл Ту ордендерімен және медалдермен марапаталған.

Жаның жаннатта болсын, Әнші Аға!

Мінбер-ақпарат