Ақордада Елбасы Н.Назарбаев мына мәселелер жөнінде былай деді:

Ақордада Үкіметтің кеңейтілген отырысында президент Нұрсұлтан Назарбаев мынадай мәселелер жөнінде былай деді:

1. «Ұлттық банкке сенбейтіндей менде еш негіз жоқ. Мен өткен жолы да ескерткен болатынмын, қазіргі өткір кезеңде түрлі арандатулар, өсек-аяңдар, пәлеқорлықтың барлығы пайда әкелмейді. Біз оларды жауапкершілікке тартуымыз керек. Мен тағы да Қазақстан халқына жария етемін: біз ештеңені де жасырмаймыз. Қиындықтар болса, халықпен бірге көреміз және алда туындайтын мәселені ашық айтамыз».
2. Бюджет қаржысы есебінен мерейтой жасаудан тыйылу керек. «Бізде мерейтой жалпыға ортақ сүйікті іс болып отыр. Мерейтой қайда болса, бәрі сонда. Жиындарға қатысу, банкеттерде отыру, осылай жалғаса береді. Әлемнің қай жерінде біз сияқты мерейтой өткізеді? Ұлы даталарды атап өтіп, баспасөзде, телеарналарда, ғылыми-тәжірибелік конференцияларда айту керек. Ал дүркіретіп той ұйымдастыру, айдалада мыңдаған қазақ үй тігу мерейтой иесіне не берерін айтыңдаршы маған?» Сондай-ақ ҚР Президенті ұлы бабаларымыз жайында бұқаралық ақпарат құралдары кеңінен ақпарат таратуы керектігін ерекше баса айтты. «Мерейтойды туған-туысы, демеушілер өткізсін. Менің қарсылығым жоқ. Бірақ, тек мемлекеттің қаржысына емес» деді Мемлекет басшысы.
3. “Мемлекеттік қызметті жеке бизнеске айналдырмау қажет. Бос орындарға туысқандарыңды, таныстарыңды тағайындауға болмайды. Өкінішке орай қазіргі уақытта 2 бірдей әкім, білікті маман тергелу үстінде. Ең қиыны мемлекеттік қызметкерді дайындап, біліктілігін шыңдап, жақсы бір орынға тағайындайды. Ал ол болса бәрін былықтырып жібереді. Құранда жазылған: “Сақтанғанды Аллах та сақтайды” деп. Ал біздің мемлекеттік қызметкерлер команда жинап, ақыры бандаға айналып кетеді.”
4. “Отандық мектептердегі білім беру саласында “Балапан” бағдарламасын жүзеге асыруды, орта білім беретін мектептерде 12 жылдық жүйеге көшуді кезең-кезеңмен жүзеге асыруды жалғастыру қажет”

Дайындаған Қарамер