Асқар Мұратұлы “ҚазАвтоЖол” төрағасы қызметінен босатылды. Бұл туралы Мұратұлы өзінің Facebook парақшасында жазды.
“Бүгін менің «Қазавтожол» ұлттық компаниясындағы соңғы жұмыс күнім. Ең бастысы – осы уақыт аралығында жүзеге асқан барлық жобалар менің әріптестерімнің жемісті еңбегі деп білемін.
Мемлекет басшысы мен Үкіметтің бізге жүктеген тапсырмаларына сай Республикалық маңызы бар 3 мың 600 шақырым жолда орта және күрделі жөндеу жұмыстары орын алып, оның 2 мың 200 шақырымында қозғалыс берілді, 324 шақырымы іске қосылды. Алматы қаласындағы «Алтын Орда» базары маңындағы жол айырығында қозғалыс ашылды. «Қызылорда – Жезқазған» жолы құрылысының барлық рәсімдері өткізіліп, келісімге қол қойылды. Жоба биыл басталады. 20-дан астам жол бойындағы сервистік нысандар пайдалануға берілді. Әлемнің бірнеше жетекші банктерімен ынтымақтастық келісім шарттарына, бірқатар отандық ірі компаниялармен көпжақты меморандумдарға қол қойылды.
Сондай-ақ, Компания қызметінің ашықтығы мен жариялылығын қамтамасыз ету үшін Қоғамдық кеңес пен арнайы, тұрақты Комиссия құрылды. Комиссияның алдына қойған басты мақсаты – барлық тендерлер, сатып алулардың ашық түрде өткізілуіне қатаң бақылау орнату, кері байланысты жүзеге асыру, сыбайлас жемқорлыққа итермелейтін факторлады жою, заңға қайшы келетін іс-әрекеттердің алдын алу болып табылады.
Осы орайда маған сенім артқан Мемлекет басшысы – Қасым-Жомарт Кемелұлы Тоқаевқа, Премьер-Министрге, тиісті министрлікке, сондай-ақ барша әріптестеріме, мердігер ұйымдарға, қоғам белсенділеріне, және де, ең бастысы – жаздың аптап ыстығында да, қатты аязында да жолда жұмыс істейтін әріптестеріме алғысым шексіз. Еңбектеріңіз жансын!
Бұқаралық ақпарат құралдарының өкілдеріне объективті сын мен сындарлы диалог үшін рахмет айтамын!”- делінген жазбада.
Парақшамызға жазылыңыз
