Сенатор Дана Нұржігіт елдегі жастар саясаты мәселелеріне арналған Сенаттағы парламенттік тыңдау кезінде погонды жастардың проблемалары туралы айтып берді.
«Әскерде болып жатқан төтенше жағдайлар, жас курсанттардың құпия жағдайдағы өлімі, әскердегі әлімжеттік оқиғалары бозбала бойында бүр жарып келе жатқан отаншылдық сезімді аяздай қарып, санасына ауыр соққы болып тиеді. Осындай оқиғаларды естіген қай ана баласын әскерге жібергісі келеді?! 2021 жылы әскери қызметшілердің өзін-өзі өлтіруге дейін жеткізу фактісі бойынша 16 қылмыс тіркелсе, биылғы жылдың 4 айында 4 қылмыстық іс қозғалған. Әскери училищелердің курсанттары мен мерзімді қызметтегі сарбаздар бейбіт уақытта қазаға ұшырамауы тиіс», – деді Дана Нұржігіт.
Парламент мүшесі қоғамның бір бөлігі болып табылатын армия қоғамның өзінде орын алған проблемалардың айнасы екенін атап өтті. Депутат осыған байланысты болашақ әскери қызметкерлермен жұмыс істеу тәсілдері мен әдістерін қайта қарауға шақырды. Дана Нұржігіт сонымен қатар жас ғалымдарды, ауыл шаруашылығы қызметкерлерін, сирек мамандықтарды таңдаған адамдарды, яғни трендтік қана емес, қоғамға қажетті мамандықтарды да меңгеретіндерді белсенді қолдаудың маңыздылығын атап өтті.
Парақшамызға жазылыңыз
